Það er ekki víst að allir lesendur Vínsíðunnar kannist við þrúguna Pinot Blanc. Þrúgan er eitt af afsprengjum Pinot Noir, en sú þrúga er frekast óstöðug – erfðafræðilega séð – og hefur í gegnum tíðina þróast í ýmsar áttir. Þekktasta afbrigði Pinot er auðvitað Pinot Noir, en af öðrum afbrigðum má nefna Pinot Meunier (notuð í kampavín), Pinot Gris og svo þrúguna sem hér um ræðir, Pinot Blanc.
Kært barn hefur mörg nöfn, eins og máltækið segir, og það á við um margar þrúgurnar. Í Frakklandi kallast þrúgan Pinot Blanc og á Spáni heitir hún Pinot Bianco. Í Þýskalandi, norður-Ítalíu og Austurríki kallast þrúgan Weißburgunder og í Ungverjalandi heitir hún Fehér Burgundi. Í Kaliforníu eru gerð vín úr Pinot Blanc, en sum Kaliforníuvín sem kölluð eru Pinot Blanc eru reyndar úr þrúgunni Melon de Bourgogne (þetta kom víst í ljós á 9. áratug síðustu aldar og í kjölfarið eru þeir framleiðendur sem eru í raun að rækta Melon de Bourgogne hægt og rólega að skipta yfir í Pinot Blanc).
Líkt og margar aðrar þrúgur þá hafa staðhættir talsverð áhrif á vínin sem Pinot Blanc gefur af sér, og svo gilda auðvitað mismundandi lög og reglur um víngerð í þeim héruðum sem þrúgan er ræktuð í. Oftast eru vínin þurr með góða fyllingu. Sums staðar, s.s. í Alsace og Austurríki, eru líka gerð sætvín úr Pinot Blanc, og þá er heimilt að nota Pinot Blanc við gerð Vin Santo sætvína á Ítalíu. Yfirleitt eru vínin ekki ætluð til langrar geymslu og njóta sín best þegar þau eru ung.
Vín dagsins
Vín dagsins kemur frá vínhúsi Judith Beck í Austurríki. Judith lærði víngerð hjá Matthíasi föður sínum, en sótti sér reynslu hjá m.a. Cos d’Estournel í Bordeaux og Errazuriz í Chile. Hún tók svo við keflinu af föður sínum árið 2004 og gerir nú fjölmörg vín úr þeim þrúgum sem þekktastar eru í Austurríki – Pinot Blanc, Gewurztraminer, Blaufrankisch, St. Laurent og Pinot Noir, svo nokkrar séu nefndar. Þá er Judith Beck í hópi 9 vínhúsa í nágrenni Neusiedler-vatns, sem kalla sig Pannobile. Markmið hópsins eru að búa til vín sem endurspegla sérkenni svæðisins – áhugasamir geta lesið sér betur um þetta verkefni hér.
Vín dagsins er gert úr þrúgunni Pinot Blanc, sem í Austurríki kallast Weißburgunder. Að lokinni gerjun í stórum eikarámum fékk vínið að liggja í 5-6 mánuði „sur lie“ – á gerinu.
Beck Weißburgunder 2021 er fölgult á lit, unglegt, með miðlungsþéttan ilm af ylliblómum, ferskjum, perum, sítrónum, eplum, ananas, lychee og örlitlum mangó-keim. Í munni er vínið þurrt, með miðlungs sýru og miðlungsfyllingu. Ylliblóm, sítrónur, epli, ananas, perur, ferskjur og smá seltu í þægilegu eftirbragðinu. Góð kaup (3.399 kr). Fer vel með fiskréttum, salati, ýmsum grænmetisréttum, ljósu fuglakjöti og pasta í rjómasósum.
Notendur Vivino gefa þessu víni 4,0 stjörnur (reyndar ekki nema 44 umsagnir þegar þetta er skrifað). Robert Parker gefur þessu víni 90 stig.
