Síðasta vínið að sinni í umfjöllun minni um Georgísk vín kemur frá vínhúsi Koncho, sem ég fjallaði aðeins um fyrir nokkrum dögum. Vínhús Koncho á sér langa sögu sem nær aftur til ársins 1737, en þetta vín er þó gert á nútímalegan hátt. Þrúgurnar (100% Saperavi) eru handtíndar af vínviðnum, losaðar af stilknum og pressaðar. Vínið er látið gerjast við nokkuð lágt hitastig og þegar áfengismagnið nær 13% er vínið kælt til að stöðva gerjunina og þannig verður vínið hálfsætt.
Koncho Kindzmaraulin Semi-Sweet 2021 hefur djúpan rúbínrauðan lit. Í nefinu finnur maður kirsuber, plómur, rjómakaramellur, kakó (brúnar Töggur), estragon og granatepli. Í munni er vínið hálfsætt, með ágæta fyllingu og þokkalega sýru. Eftirbragðið er nokkuð einfalt – kirsuber, plómur og rjómakaramellur. Sætan yfirgnæfir aðeins eftirbragðið án þess að bæta of miklu við það. 88 stig. Góð kaup (3.265 kr). Vínið er í góðu jafnvægi og fellur eflaust vel í kramið hjá mörgum. Fer vel með grilluðu lambi, ofnsteiktum lambahrygg með rjómalagaðri sveppasósu, jafnvel purusteik.
Notendur Vivino gefa þessu víni 4,1 stjörnu (70 umsagnir þegar þetta er skrifað).
