Allegrini-fjölskyldan er ein þekktasta vínfjölskylda Ítalíu og þekkt fyrir sín gæðavín. Ég kynntist Allegrini-vínunum fyrst þegar ég bjó í Svíþjóð og þar var ávallt hægt að ganga að gæðunum vísum. Allegrini er staðsett í Vapolicella-héraði á norður-Ítalíu og framleiðir að mestu klassísk Valpolicella-vín.
Vín dagsins sker sig að nokkru leyti frá öðrum vínum Allegrini að því leyti að það er ekki klassískt Valpolicella-vín. Reglur Valpolicella kveða á um hvaða þrúgur megi nota í rauðvín og hvítvín – Corvina, Corvinone, Rondinella og Molinara, auk þess sem nota má örlítið af Rossignola, Negrara, Barbera, Sangiovese og Bigolona. Í víni dagsins er hins vegar, auk Molinara, Rondinella og Corvina, einnig að finna Cabernet Sauvignon og Merlot. Það má því ekki kenna vínið við Valpolicella og í staðinn flokkast það sem einfalt ítalskt rauðvín. Þá finnst mér það líka merkilegt að þetta vín er ekki að finna á heimasíðu Allegrini.
Allegrini Belpasso Rosso 2017 er kirsuberjarautt á lit og komið með örlítinn þroska. Í nefinu finnur maður brómber, plómur, rúsínur, leður, vanillu og smá möndlur. Miðlungstannín, ágæt sýra en skortir fyllingu. Leður, kirsuber og smá eik í eftirbragðinu. Ágætt hversdagsvín (2.790 kr). 86 stig.
Notendur Vivino gefa þessu víni 3,7 (147 umsagnir þegar þetta er skrifað).
