Þó að vínhúsið [Yellow Tail] sé staðsett í Ástralíu, nánar tiltekið í smábænum Yenda í Nýja Suður-Wales, þá rekur það ættir sínar til Sikileyjar. Um miðja síðustu öld fluttu hjónin Filippo og Maria Casella frá Sikiley til Ástralíu og hófu þar vínrækt undir eigin nafni – Casella. Fyrsti árgangurinn leit svo dagsins ljós á því herrans ári 1971.
Fyrirtækið stækkaði hægt og rólega en þáttaskil urðu í rekstrinum þegar sonur þeirra, John Casella, tók við stjórnartaumunum árið 1995. John áttaði sig á að það væri bæði þörf og eftirspurn eftir vínum sem væru í senn aðgengileg og um leið stöðug í bragði, verði og að gæðum – [yellow tail] varð til árið 1998. Ég hef þó ekki fundið skýringu á því hvers vegna nafnið er haft í hornklofum…
Fyrsta sendingin fór til Bandaríkjanna árið 2001 og markmiðið var að selja 25.000 kassa fyrsta árið. Viðtökurnar fóru þó fram úr björtustu vonum og á fyrsta árinu seldust um ein milljón kassa. Salan jókst stöðugt og árið 2003 var hún komin í 5 milljónir kassa. Áfram hélt vöxturinn og árið 2006 var tekin í notkun framleiðslulína sem getur afkastað 36.000 flöskum á klukkustund!
Árið 2014 keypti Casella-fjölskyldan vínhús Peter Lehmann og hefur síðan bætt enn frekar í safnið. Í dag eru 8 vínhús í eigu Casella-fjölskyldunnar.
Í dag fást 7 vín frá [yellow tail] í vínbúðunum – 2 hvít, 1 rósa og 4 rauð.
Vín dagsins
Yellow Tail Pinot Grigio 2019 er fölgult, unglegt og ekki með mikla dýpt. Í nefinu finnur maður rauð epli, perur, milda sítrustóna og vott af suðrænum ávöxtum. Í munni er vínið frísklegt með miðlungsfyllingu og ágætan ávöxt. Rauð epli, perur og ástaraldin í þægilegu eftirbragðinu. Góð kaup (1.999) kr. 87 stig. Fer vel með austurlenskum mat (indverskt?), pastaréttum, salati, léttari fiskréttum eða sem fordrykkur á meðan kvöldmaturinn er á grillinu. Sé þetta alveg fyrir mér á pallinum í sumar. Sýnishorn frá innflytjanda.
Notendur Vivino gefa þessum árgangi 3.6 stjörnur (612 umsagnir þegar þetta er skrifað).
