Eins og ég hef nú oft prófað vínin frá CUNE, þá er eiginlega fáránlegt að það séu ekki fleiri dómar um þau vín á Vínsíðunni. Reserva-vínin frá 2010 og 2011 voru alveg frábært, sem og Gran Reserva. Því miður eru þeir árgangar nú horfnir úr hillum vínbúðanna en sem betur fer er 2015 kominn í staðinn en hann er líka mjög góður og því engin ástæða til að örvænta.
Cune Rioja Crianza 2015 er kirsuberjarautt á lit, unglegt með miðlungsdýpt. Í nefinu er dæmigerður Rioja-ilmur – kirsuber, leður, vanilla og pipar. Í munni eru mild tannín, hófleg sýra og miðlungs fylling. Eik, leður, kirsuber og smá kakó í ágætu eftirbragðinu. Fer vel með léttum kjötréttum, pylsum, ostum og ljósu fuglakjöti sem hefur ratað á grillið. 87 stig. Ágæt kaup (2.399 kr). Athugið að flaskan er með skrúftappa sem er ekki mjög algengt þegar spænsk vín eru annars vegar.
