Fyrir ekki svo löngu fjallaði ég um ágætisvín frá vínhúsi Angelo Rocca & Figli úr þrúgunni Negroamaro. Vín dagsins kemur frá sama framleiðanda en verður þó að teljast í hefðbundnari stíl, þó kannski ekki beint hefðbundnum ítölskum stíl. Vínið er gert úr góðkunningjum okkar Cabernet Sauvignon og Merlot og kemur frá Sikiley. Það er í sömu vörulínu og áðurnefnt negroamaro og er kennt við gullturninn – Torri d’Oro.
Torri d’Oro Cabernet Merlot 2013 er dökkkirsuberjarautt á lit og unglegt að sjá. Í nefinu finnur maður leður, plómur, tobak, krydd, anís og vanillu. Í munni eru stinn tannín, góð sýra og fínn ávöxtur. Plómur, hrat, krydd, tóbak, smá súkkulaði og kaffi í ágætu eftirbragðinu. Góð kaup (2.398 kr). 88 stig.