Góður Spánverji

Við Íslendingar þekkjum vel vínin frá Montecillo, því þau hafa verið fáanleg í hillum vínbúðanna um margra ára skeið.  Vín dagsins er líklega eitt af þeim langlífustu í vínbúðinni (vörunúmer 137) og ekki að ástæðulausu.  Vínhúsið á sér rúmlega 140 ára sögu í Rioja, en nafnið Montecillo kom þó ekki til fyrr en árið 1943. Árið 1973 keypti Osborne-fjölskyldan fyrirtækið, en Osborne er best þekkt fyrir Sherrýið sitt (gera líka púrtvín og svo léttvín undir merkinu Solaz, sem einnig fæst í vínbúðunum).  Vín dagsin er Gran Reserva, sem þýðir að það þarf að þroskast minnst 2 ár í eikartunnum og svo 3 ár á flösku áður en það fer í sölu.
Montecillo Rioja Gran Reserva 2008 er kirsuberjarautt á lit og komið með smá sýnilegan þroskan.  Í nefinu finnur maður kirsuber, tóbak, leður, pipar, plómur, súkkulaði og vott af anís.  Í munni eru mjúk tannín, ágæt sýra, góð fylling og góður ávöxtur.  Kirsuber og plómur ráðandi í eftirbragðinu ásamt smá lakkrískeim.  Mjög góð kaup (3.299 kr).  Mjög gott matarvín – nautasteikur og jafnvel villibráð. 90 stig.