Fyrir skömmu fjallaði ég um hvítvín úr nýrri vörulínu Gerard Bertrand sem nefnist Héritage. í þeirri vörulínu er skírskotun til sögu suður-Frakklands. Vínið sem hér um ræðir ber nafnið Cite de Carcassonne “An 1130” og er nefnt eftir samnefndum bæ í Occitaníu. Á þessu svæði hefur verið byggð allt frá lokum steinaldar, og þarna lágu verslunarleiðir milli Atlantshafs og Miðjarðarhafs. Rómverjar áttuðu sig strax á mikilvægi þessarar hæðar og höfðu þar aðsetur allt þar til Rómaveldi leið undir lok. Fyrsta virkið umhverfis þorpið var byggt árið 1130. Bærinn er nú á heimsminjaskrá Unesco.
Vín dagsins
Hér er á ferðinni vín frá Languedoc-Roussillon og það flokkast sem IGP Cité de Carcassonne. Þetta er hreint Merlot sem hefur fengið stuttan tíma í eikartunnum.
Gerard Bertrand Héritage Cite de Carcassonne „An 1130“ Merlot 2020 er fjólurautt á lit, unglegt með miðlungsdýpt. Í nefinu finnur maður sólber, bláber, vanillu, negul, kryddjurtir og smá steinefni. Í munni eru hrjúf tannín, miðlungs sýra og miðlungs ávöxtur. Leður, bláber og kirsuber í ágætu eftirbragðinu. Góð kaup (2.599 kr). 88 stig. Fer vel með lambi, léttari villibráð og ostum.
Notendur Vivino gefa þessu víni 4,0 í einkunn (73 umsagnir þegar þetta er skrifað).
