Vínklúbbsfundur!

Vínklúbburinn hélt nýlega annan fund þessa vetrar og samkvæmt venju voru ákaflega spennandi og flott vín sem klúbbmeðlimir spreyttu sig á.
Fyrsta vín kvöldsins var fallega rautt vín með góðan þroska og flotta tauma.  Í nefinu var áberandi eik, ásamt vanillu, jarðarberjum, sólberjum og kryddum.  Í munni voru mikil tannín en vínið samt silkimjúkt, en þó frekar lokað bragð.  Eftirbragðið þurrt með sæmilegum ávexti.  Vínklúbburinn ákvað að gefa þessu víni 88 stig, sem gerir u.þ.b. 4 stjörnur.  Við gátum rétt til að hér væri spánverji á ferð, en við vorum nokkuð langt frá aldrinum – töldum þetta geta verið 2007-2008, en það reyndist nærri 10 árum eldra, því hér var um að ræða Faustino I Gran Reserva Rioja 1999. Athugið að sá árgangur sem nú er til sölu í Vínbúðunum er 2001, sem er einnig firnagóður, en Faustino I er yfirleitt mun eldri en önnur Gran Reserva-vín sem eru á boðstólum á hverjum tíma.