Í fyrra gerði ég dálitla úttekt á rósavínum í vínbúðum ÁTVR. Þetta var svo sem engin vísindaleg úttekt – ég prófaði nokkrar tegundir og var almennt sáttur við þær. Úrvalið hefur heldur aukist síðan þá og nú er einmitt rósavínsþema í vínbúðunum og vonandi tekur nú landinn við sér og tekur vel á móti þessum fína sumardrykk. Rósavín eru nefnilega alveg kjörinn sumardrykkur – drukkið kalt og hentar vel með flestum mat (nema kannski nautasteikum og villibráð).
Fyrsta vínið sem ég prófa í ár er Muga Rosado 2015. Þetta vín er gert úr þrúgunum garnacha (grenache), viura og tempranillo. Það er gert á klassíska mátann, þ.e. safinn liggur í 12 tíma með þrúgunum og nær þannig að taka í sig smá lit, en síðan látið gerjast á eikartunnum og liggur svo í tvo mánuði á tunnum áður en það er sett á flöskur. Þetta er fölbleikt vín – laxableikt, frískleg angan af jarðarberjum, hindberjum, grænum eplum og sítrus, vottar aðeins fyrir eikinni. Frísklegt í munni – jarðarber, hindber, epli og smá apríkósur. Kostar 2.599 krónur í vínbúðunum, sem er líkleg aðeins í dýrari kantinum fyrir rósavín, en að mínu mati eitt af þeim bestu sem okkur bjóðast í vínbúðunum. Góð kaup.
Vínsíðan
Smelltu hér til að gefa einkunn
[Alls: 0 Meðaltal: 0]