Eins og áður hefur komið fram hér á Vínsíðunni þá hef ég lengi verið aðdáandi vínanna frá Peter Lehmann. Fyrir skömmu skrifaði ég um Portrait Shiraz 2017 og nú er röðin komin að öðru rauðvíni í sömu línu. Portrait-línan frá Peter Lehmann er hugsuð þannig að hún eigi að endurspegla loforð sem Peter Lehmann gaf vínbændum á sínum tíma – að búa til vín sem eru einkennandi fyrir Barossa-dalinn. Lehmann kaupir nefnilega bróðurpartinn af sínum þrúgum frá vínbændum í Barossa. Þannig koma þrúgurnar í víni dagsins frá fjölmörgum vínbændum í Barossa.
Vín dagsins
Vín dagsins er 100% Cabernet Sauvignon úr Barossa-dalnum. Að lokinni gerjun er vínið látið hvíla í 15 mánuði á tunnum úr amerískri og franskri eik. Um 10% af tunnunum eru nýjar en afgangurinn hefur verið notaður a.m.k. einu sinni áður.
Peter Lehmann Portrait Cabernet Sauvignon 2017 er kirsuberjarautt á lit, með miðlungsdýpt og byrjandi þroska. Í nefinu finnur maður kirsuber, leður, plómur, smá mentól og ögn af vanillu. Í munni eru hrjúf tannín, rífleg sýra og ágætur ávöxtur. Sólber, plómur, eik og ögn af tóbaki í ágætu eftirbragðinu. 87 stig. Ágæt kaup (2.999 kr.). Fer ágætlega með nautakjöti, lambakjöti og léttari villibráð. Tilbúið til neyslu núna en þolir alveg geymslu í allt að 5 ár til viðbótar.
Notendur Vivino gefa þessu víni 3,6 stjörnur (146 umsagnir þegar þetta er skrifað)
